අමීෂා මොනවද අලුත් තොරතුරු?
මේ වනවිට ඔබ රඟපා ඇති චිත්‍රපට මොනවාද?
”සඳ දෙව් දෝනි”, “සදාකල් ඔබ මගේ”, “සුදුහංසි”, “සර් ලාස්ට් චාන්ස්”, “ජය පිට ජය”, “ඩබල්ගේම්” වැනි චිත්‍රපටවල මම රඟපාල තියෙනවා. මෙයින් චිත්‍රපට 4 ක් තිරගත වී අවසන්.
ඔබ වැඩිපුර ටෙලිනාට්‍යවල දකින්න නැත්තේ ඇයි?
ඒක ඇත්ත මම වැඩිපුර ටෙලිනාට්‍යවලට සම්බන්ධ වුණේ නෑ. ‘කාව්‍යා’, ‘නිලංජනා’ මම මුලදි දායක වුණු ටෙලිනාට්‍ය.
ඔබ කලාවට සම්බන්ධ වුණු ආකාරය සිහිපත් කරමු?
මගෙ ගම ජාඇළ. ජාඇළ නිමලමරියා බාලිකා විද්‍යාලෙන් තමා මම ඉගෙන ගත්තේ. පාසලේදි මම වැඩියෙන්ම දක්ෂතා පෙන්නුවේ නර්තනයට. පාසලෙන් අස්වුණාට පසුව මම නර්තන කණ්ඩායමකට සම්බන්ධ වුණා. එහෙම ඉන්න අතරෙදි තමයි කැරෝකේ ච්ඍච්එකක මගේ නර්තනයක් දැකපු තිස්ස වීරසිංහ මහත්මිය චිත්‍රපටයකට මට ආරාධනා කළේ. මුලදි මම චිත්‍රපටවලට සම්බන්ධ වුණේ නර්තන ඉදිරිපත් කරන්න. ඉන් කලකට පසුවයි චිත්‍රපටවල රංගනයට සම්බන්ධ වුණේ.
ඔබ මෙතෙක් රඟපා තිබෙන චිත්‍රපට සියල්ලම වාගේ වාණිජමය චිත්‍රපට නේද?
රඟපෑමේදී වාණිජමයද, සම්භාව්‍යද කියල වෙන්කරන්න මම කැමැති නෑ. මම හැම තිස්සෙම උත්සාහ කරන්නේ හොඳ රංගනයක් ඉදිරිපත් කරන්නයි. මගේ රංගන හැකියාව ගැන මට විශ්වාසයක් තියෙනව. ඒ නිසා මම හිතනව රඟපාන්න යමක් තියෙන හොඳ චරිත මට ලැබුණොත් ඒවා සාර්ථකව කරන්න මට හැකිවෙයි කියලා.
ඔබ මෙගා ටෙලි නාට්‍යවලට කැමැති නැතිද?
මෙගා ටෙලිනාට්‍ය කියල බෙදීමක් මගෙ නෑ. මම එවැනි ටෙලිනාට්‍යවල රඟපාලත් තියෙනව. මම කැමැති නැත්තෙ ඒ ටෙලිනාට්‍යවලට නෙමෙයි; ඒවා හැදෙන ක්‍රමයට. සමහර දීර්ඝ ටෙලිනාට්‍යවල කොටස් දෙක තුනකට අයත් පිටපත විතරයි මුලදි ලැබෙන්නෙ. ඊට පස්සේ අපට පිටපත ලැබෙන්නේ දර්ශන තලයට ගියාට පසුවයි. ඉතින් රඟපෑමක් ඉදිරිපත් කරන්නෙ කොහොමද? කොටස් 25 ක 30 ක ටෙලිනාට්‍යයක හරි කොටස් 100 ක ටෙලිනාට්‍යයක හරි පිටපත මුලදි ලැබෙනවා නම් මම කැමැතියි රඟපාන්න. මම ඔය ඉතා දීර්ඝ ටෙලි නාට්‍යවලට අකැමැති තවත් හේතුවක් තියෙනවා. සමහර දීර්ඝ ටෙලිනාට්‍ය අවුරුදු 2 ක් 3 ක් විතර විකාශය වෙනවා. එතකොට එකම චරිතය රඟපාල අපටම එපා වෙනවා. ප්‍රේක්ෂකයින්ටත් එපා වෙනවා. ඒ වගේම වෙනස් නිර්මාණයකට දායකවීමේ අවස්ථාවත් මෙහිදී නැති වෙනවා. මේ භේද නිසයි මම ඉතා දීර්ඝ ටෙලිනාට්‍යවලට අකැමැති. එහෙම නැතිව ඒවාට සම්බන්ධ වී සිටින ශිල්පීන්ගේ හෝ ශිල්පිනියන්ගේ අධ්‍යක්‍ෂවරුන්ගේ හැකියාව අවතක්සේරු කරන්නේ නෑ.
රංගනය සරලයි කියා ඔබ හිතනවද?
මම කොහෙත්ම එහෙම හිතන්නේ නෑ. රංගනය කියන්නේ ගැඹුරු විෂයක්. ඒ ගැඹුරු විෂයේ යෙදෙන ගමන්මයි, අද අපට ඒ විෂය ගැන ඉගෙනගන්න සිදුවෙලා තියෙන්නේ. හොඳ රංගනයක් ඉදිරිපත් කරන්න සමාජය පිළිබඳව, මිනිසුන්ගේ හැඟීම් පිළිබඳව හොඳ අවබෝධයක් තියෙන්නත් ඕන.
ඔබ වඩාත් කැමැති රංගනයටද නර්තනයටද?
මම වඩාත් කැමැති නර්තනයට. මගේ නර්තන හැකියාව රංගනයට උපකාර වෙලා තියෙනව. නර්තන ප්‍රසංගවලට මම නිතරම සහභාගි වෙනවා. විදෙස් රටවල් කීපයකටමත් නර්තන ප්‍රසංග සඳහා මම ගිහිං තියෙනවා.
ඔබ නිළියක නොවුණා නම්...
පුංචි කාලෙ ඉඳල මම ආශා කළේ නැටුම් ගුරුවරියක් වෙන්න. නිළියක නොවුණා නම් මම අද නැටුම් ගුරුවරියක්.
නිළියක වීමේ සිහිනය ඔබේ හිතේ කොතන හෝ තිබුණාද?
නැහැ. එහෙම හීනයක් තිබුණේ නැහැ. නමුත් මම චිත්‍රපට නරඹන්න ගොඩක් ආශා කළා. චිත්‍රපට වගේම චිත්‍රපට ගීත ඇතුළත් රූපවාහිනී වැඩසටහන් නරඹන්නත් මම පුරුදු වෙලා සිටියා.
ඔබේ පවුලේ විස්තර සඳහන් කරන්න.
අම්මයි තාත්තයි අක්කයි මමයි තමයි පවුලේ ඉන්නෙ. අක්කා විවාහකයි.
ඔබට පෙම්වතෙක් නොඉන්න බැහැනෙ නේද?
ඔව් ඉන්නවා. ඔහුත් කලාවට සම්බන්ධ කෙනෙක්. ප්‍රේමය ආදරය සෑම පුද්ගලයකුටම අවශ්‍ය දෙයක්නේ.
ඔබ කලා ක්ෂේත්‍රයේ දිගටම රැඳෙනවද?
ඔව් මට හැකිතාක් කල් රංගනයේ යෙදෙනව. අද රංගන ක්ෂේත්‍රය කීපදෙනෙකුට පමණක් සීමාවෙලා කියල මට හිතෙනව. ඒක හැකියාව තිබෙන පිරිසකට ඉදිරියට එන්න බාධාවක්. කෙසේ වෙතත් හොඳ නිර්මාණවලට දායක වෙමින් රංගනයෙන් සහ නර්තනයෙන් ඉදිරියට යාමයි මගේ බලාපොරොත්තුව.
