රජයේ හෙද නිලධාරීන්ගේ සංගමයේ වෘත්තීය සමිති ක‍්‍රියාමාර්ගයට සහයෝගය දැක්වීමක් ලෙස නොවූවත් හෙද සේවායේ පැවැත්ම වෙනුවෙන් තමන්ද අද දවසේ සියලූ සේවාවලින් ඉවත්වන බව සමස්ත ලංකා හෙද සේවා සංගමය පවසනවා. එහි සභාපති එස්.බී. මැදිවත්ත සඳහන් කළේ අද දිනයේ දිවයින පුරා සියලූ රෝහල්වල තම සංගමයේ නියෝජිතයන් අසනීප නිවාඩු වාර්තා කිරීමේ වෘත්තීය සමිති ක‍්‍රියාමාර්ගයක නිරතවන බවයි.
රිජ්වේ ආර්යා ළමා රෝහල, ද සොයිසා කාන්තා රෝහල, කාසල් වීදියේ කාන්තා රෝහල සහ මහරගම පිලිකා රෝහලෙහි අද දිනයේ මෙම වැඩ වර්ජනය ක්රියාත්මක නොවන බවද හෙද සංගම් සඳහන් කළා.
කෙසේ වෙතත් සෞඛ්‍ය අමාත්‍යාංශය අවධාරණය කළේ හෙද හෙදියන් ගෙන ඇති මෙම වෘත්තීය ක‍්‍රියාමාර්ගය අසාධාරණ බවයි. අමාත්‍යාංශයේ ලේකම් වෛද්‍ය නිහාල් ජයතිලක සඳහන් කළේ සෞඛ්‍ය අමාත්‍යවරයා සහ මුදල් අමාත්‍යාංශයේ ලේකම්වරයා සමග එක්ව ඔවුන්ගේ ඉල්ලීම් ලබාදීමට ඉදිරියේදී කටයුතු කරන බවයි.
හෙද සේවාවේ අතිකාල දීමනා වැඩි නොකිරීම,හෙද සේවාවේ අනතුරු දීමනා හා ඉන්වෙන්ට්‍රි දීමනා වැඩි නොකිරීම,දින 05 සතියේ නියමු ව්‍යාපෘතිය ක්රියාත්මක නොකිරීම,නව බඳවා ගැනීම් පළාත් සභාවලට පවරමින් ඔක්තෝම්බර් 05 වන දින නිකුත් කළ අංක 1779 දරණ ගැසට් පත්‍රය අවලංගු නොකිරීම,පැරණි ව්‍යවස්ථාව අනුව ශ්‍රේණිගත උසස්වීම් ලබා නොදීම ආදී කරුණු ගණනාවක් හේතුවෙන් අද දිනයේ සංකේත වැඩවර්ජනයක්ද දියත් කර ඇති වග රජයේ හෙද නිලධාරීන්ගේ සංගමයේ සභාපති සමන් රත්නප්රිය මහතාගේ අත්සනින් යුතුව නිකුත් කළ නිවේදනයක දැක්වෙයි.