හබරාදුව ලණුමෝදර ප්‍රදේශය හරහා ඊයේ (30 දා) සවස හමාගිය තද සුළඟකින් නිවාස රැසක වහළවලට හානි සිදුවී ඇති අතර ගස්‌ කොළන් කඩාවැටීමෙන් ගමනාගමනයට ද බාධා පැමිණ තිබිණි. නිවාස කිහිපයක වහළවල ටකරන් ද තවත් නිවාස කිහිපයක උළු ද සුළඟට ගසාගෙන ගොස්‌ තිබූ අතර විදුලි රැහැන් මතට ගස්‌ කොළන් කඩාවැටී තිබිණි.
ප්‍රදේශවාසීන් පැවසුවේ විශාල ශබ්දයක්‌ සමඟ එක්‌වරම තද සුළඟක්‌ හමාගිය බවයි.
සිද්ධිය සැලවීමත් සමඟ හබරාදුව ප්‍රාදේශීය ලේකම් අයේශා කාරියවසම්, හබරාදුව පොලිස්‌ ස්‌ථානාධිපති ප්‍රධාන පොලිස්‌ පරීක්‍ෂක අජිත් වලල්ලාවිට, හබරාදුව ප්‍රාදේශීය සභාවේ සභාපති දිල්ශාන් විදානගමගේ යන මහත්ම මහත්මීහු සහ ආපදා කළමනාකරණ මධ්‍යස්‌ථානයේ නිලධාරීහු පැමිණ අවශ්‍ය සහන සේවා සැපයීමට පියවර ගනු ලැබූහ