ඒ මහතා මේ බව පැවසූවේ අද (17) පෙරවරුවේ බත්තර මුල්ල පැලවත්ත පිහිට ජනතා විමුක්ති පෙරමුණේ ප්රධාන කාර්යාලයේ පැවති මාධ්‍ය හමුව අමතමිණි. එහිදී ඒ මහතා දැක්වූ සම්පූර්ණ අදහස් පහත පළවේ.
"2013 කියන්නේ රාජපක්ෂ පාලනයේ 8වෙනි අවුරුද්ද ආරම්භ කරන වර්ෂයයි.
පොදු පෙරමුණු ආණ්ඩුව ලෙස ගත්තොත් මේ වනවිට අවුරුදු දෙකක් ඇරෙන්නට වසර 16ක් තිස්සේ රට පාලනය කොට තිබෙනවා. එනම් ශ‍්‍රී ලංකා නිදහස් පක්ෂය ප‍්‍රමුඛ පොදු පෙරමුණේ අවුරුදු 16ක පාලනයේත් මහින්ද රාජපක්ෂ පාලනයේ අවුරුදු 08ක පාලනයේත් ආර්ථික ප‍්‍රතිලාභ තමයි මේ ජනතාවට ලැබෙමින් තිබෙන්නේ.ඕනෑම ආණ්ඩුවක් වසර 07ක් තිසේසේ රටක් පාලනය කරලා 08 වෙනි අයැවය ඉදිරිපත් කරන විට එම අයවැයෙන් සුභවාදී ආර්ථික ප‍්‍රතිඵලයක් ජනතාවට ලැබෙයි කියලා බලාපොරොත්තුවක් තියන්න පුළුවන්. නමුත් මහින්ද රාජපක්ෂ පාලනයේ අවුරුදු 07ක පාලනය තුළ අපේ රට බරපතල ආර්ථික අගාධයකට රට ඇදලා දමලා තිබෙනවා. මුදල් නියෝජ්‍ය අමාත්‍ය සරත් අමුණුගම කියා තිබෙනවා අපේ රටේ ආර්ථිකය අර්බුදයට ණය ගැනීම සහ විශාල ලෙස මුදල් අච්චු ගැසීම හැර වෙන පිළියමක් නැති බව. ආණ්ඩුව 2013 වර්ෂය සඳහා අපේක්ෂිත ආදායම වන්නේ රුපියල් කෝටි එක්ලක්ෂ තිස්දහස් හාරසියයක්. ඒ වගේම ආණ්ඩුව ණය ගැනීමට අපේක්ෂා කරනවා රුපියල් කෝටි එක්ලක්ෂ තිස්දහස් තුන්සියයක්. ඒ වගේම සාමාන්‍යයෙන් ආණ්ඩුවක් අපේක්ෂා කරන ආදායම සම්පූර්ණයෙන්ම උපයා ගැනීමේ අපහසුවක් තිබෙනවා. අපේක්ෂිත ආදායම 10%ක අව ප‍්‍රමාණයක් සහිතව තමයි ලැබෙන්නේ. එහෙම ගත්තාම ආණ්ඩුවේ අපේක්ෂිත ආදායම ලබාගන්න බලාපොරොත්තුවන ණය ප‍්‍රමාණයට සමාන වෙනවා. වෙනත් ආකාරයකින් කියනවානම් ආණ්ඩුව මාස 06ක් තමන් ලබන ආදායමෙන් ආර්ථිකය ගෙනයන විට අනෙක් මාස 06 ගත කරන්නේ ලබාගන්නා ණය මතයි. අපේ රටේ ආර්ථිකය මෙවැනි අසීරු අඩියකට ගෙනත් තිබෙනවා. මහින්ද රාජපක්ෂ පාලනය අවුරුදු 07ක් ඇවෑමෙන් අපේ රට ගෙනල්ලා තිබෙන්නේ එතනටයි.
පසුගිය දවසක පරිවාස හා ළමාරක්ෂණ කොමසාරිස්වරිය කියා තිබුණා අපේ රටේ දැඩි ආර්ථික අපහසුතාවය හා පෝෂණ ඌණතාවය නිසා ශ‍්‍රී ලංකාවේ 40,000කට ආසන්න දරු පිරිසකගේ අධ්‍යාපනය මුළුමනින්ම අඩාලවී ඇති බව. එතනටයි මහින්ද රාජපක්ෂ අපේ රට ගෙනත් තිබෙන්නේ. ඒ වගේම පසුගිය 11වෙනි දින මුදල් අමාත්‍යාංශ ලේකම්වරයා විසින් සියලුම අමාත්‍යාංශවල ලේකම්වරන් කැඳවා රැස්වීමක් පවත්වා තිබෙනවා. එහිදී අමාත්‍යාංශ ලේකම්වරුන්ට උපදෙස් ලබාදී තිබෙනවා රාජ්‍ය සේවකයන්ට ගෙවන වැටුප් නොවන පුනරාවර්තන වියදම් සියල්ල කපා හරින්න කියලා. ඔහු පවසා තිබෙන්නේ ආණ්ඩුව දැඩි මූල්‍ය අර්බුදයකට පත්වී සිටින බවයි. අතිකාල, බටා සහ ඉන්ධන දීමනා සියල්ල කපාහරින ලෙස උපදෙස් දී තිබෙනවා. ඇත්තම ගත්තොත් රාජ්‍ය සේවකයින් තමන් ලබාගත් ණය ආදියට වාරික මුදල් කැපීමෙන් මූලික වැටුපෙන් අතට ලැබෙන්නේ ඉතාම සුළු මුදලක්. ඔවුන් ජීවිතය ගැටගහගන්නේ තමන්ට ලැබෙන දීමනා මුදල්වලින්. ඉතිං පී. බී. ජයසුන්දර කියනවා එම දීමනා සියල්ල කපා දාන්න කියලා. මේ ආණ්ඩුව රටේ ජනතාව ආර්ථික වශයෙන් ඉතාමත් අසීරු අඩියකට ඇද දමලා තිබෙන්නේ. ඒ ආර්ථික අමාරුකම් අස්සේ තමයි ආණ්ඩුව පෙට‍්‍රල් ගාස්තු ඉහළ දමන්නේ.
ආණ්ඩුව පසුගිය මසක පමණ කාලය තුළ ගෙනා පෙට‍්‍රල් ප‍්‍රමාණයන්ගේ එකතුවේ සාමාන්‍ය අගය ගණනය කළ පසුව පෙට‍්‍රල් ලීටරයක සාමාන්‍ය මිල වන්නේ රුපියල් 89ක් පමණයි. වරායට ගොඩබාන ලද පෙට‍්‍රල් ලීටරයක මිල රුපියල් 89යි. නමුත් අපේ ගමේ ෂෙඩ් එකේ පෙට‍්‍රල් ලීටරයක මිල රුපියල් 159ක් වෙනවා මේ මිල වැඩි කිරීමත් සමග. මැදපෙරදිග තෙල් නැවක පටවලා, දින ගණනාවක් මුහුදේ නැව යාත‍්‍රා කරලා, කොළඹ වරායටත් ආවට පස්සේ ලීටරයක මිල රුපියල් 89ක් වන විට කොළඹ සිට අපේ ගමේ ෂෙඩ් එකට එනවිට තවත් රුපියල් 70ක් ආණ්ඩුව පෙට‍්‍රල් ලීටරයකට අයකරනවා.
පෙට‍්‍රල්වලට බදුගැසීම ආණ්ඩුවේ එකම ආදායම බවට පත්වෙලා.
වරාය හා ගුවන් සේවා බද්ධ 5%යි. වරාය ගාස්තු ලෙස 2.79%ක් අය කරනවා. එවිට රුපියල් 89ක් වන පෙට‍්‍රල් ලීටරයක් රුපියල් 95.91ක් වෙනවා. ඉන්පසු ආණ්ඩුව මෙයට අමතර බද්ධක් ලෙස රුපියල් 25ක් බද්ධක් අය කරනවා. පෙට‍්‍රල් සංස්ථාවෙන් සේවා ගාස්තු ලෙස රුපියල් 1.50ක් අය කරනවා. පෙට‍්‍රල් ෂෙඩ් හිමියාගේ ලාභය රුපියල් 1.25ක් වෙනවා. මේ බදුත්, ලාභත්, සේවා ගාස්තුත් සියල්ල එකතු කළාම පෙට‍්‍රල් ලීටරයක වටිනාකම රුපියල් 129ක් පමණයි. එම පෙට‍්‍රල් ලීටරයෙන් තෙල් සංස්ථාව තවත් රුපියල් 30ක ලාභයක් අයකර ගන්නවා. එනම් තෙල් සංස්ථාව විසින් පෙට‍්‍රල් ලීටරයකින් රුපියල් 60කට ආසන්න ප‍්‍රමාණයක සොරාකෑමක් සිදුකරනවා. ඔබ විසින් යතුරු පැදියට පෙට‍්‍රල් ලීටර් දෙකක් පිරවූ විට එයින් ආණ්ඩුවට රුපියල් 120ක බද්දක් ගෙවනවා. ආණ්ඩුව ජනතාවගේ දෛනික අවශ්‍යතාවලට එදිනෙදා බදු ගසමින් මේ විදියට මුදල් එකතු කරනවා.
ආසන්න වශයෙන් මසකට පෙට‍්‍රල් ලීටර් මිලියන 80ක් පමණ විකිණෙනවා. මිලියන 80 හැටෙන් වැඩි කළොත් ආණ්ඩුව පෙට‍්‍රල් වලින් පමණක් මසකට රුපියල් මිලියන 4,800ක ලාභයක් ලබනවා. ආණ්ඩුව අවුරුද්දකට රුපියල් මිලියන 56,600ක් ලාභ ලබනවා. පෙට‍්‍රල් ජනතාවගේ සාමාන්‍ය පාරිභෝගික භාණ්ඩයක් වෙනවා වෙනුවට ආණ්ඩුවේ ප්රධාන ආදායම් මාර්ගය බවට පත්වෙලා. අපේ රටේ සාමාන්‍යයෙන් ජීවත් වන පවුල් ගණන මිලියන 05යි. අපේ රටේ හැම පවුලක්ම අවුරුද්දකට පෙට‍්‍රල් වෙනුවෙන් රුපියල් 11,000ක බදු මුදලක් ගෙවලා තිබෙනවා.
මසකට පවුලක් ආසන්න වශයෙන් පෙට‍්‍රල් වෙනුවෙන් පමණක් රුපියල් 1,000කට ආසන්න බද්දක් ගෙවනවා.
ඛනිජ තෙල් අමාත්‍ය සුසිල් පේ‍්‍රමජයන්ත කියනවා, පෙට‍්‍රල්වලට බදු ගැසීමට සිදුවනනේ විදුලි බල මණ්ඩලයට ලබාදෙන තෙල් නිසා විශාල පාඩුවක් තෙල් සංස්ථාවට සිදුවන නිසා කියලා. ලංකාවේ තෙල් බෙදාහැරීමේ එකාධිකාරයෙන් 1/3ක් අයි. ඕ. සී.ය සතුව තිබෙනවා. නමුත් අයි. ඕ. සී. සමාගම විදුලි බල මණ්ඩලයට තෙල් ලබාදෙන්නේ නැහැ. එමනිසාම අයි. ඕ. සී. සමාගම විශාල ලාභයක් ලබනවා. 13 ගැන කතා කරන මහත්වරුන්ගෙන්, ඉන්දීය ආර්ථික ව්‍යාප්තවාදය ගැන බෙරිහන් දෙන මහත්වරුන්ගෙන් අපි අහනවා ආණ්ඩුව හැම පෙට‍්‍රල් ලීටරයකින්ම රුපියල් 30ක ලාභයක් ඉන්දීය සමාගමට ගෙවනවාද කියලා? ඉන්දීය සමාගම රටේ මුදල් ඩොලර් ලෙස එලියට ගෙනයනවා. අනිවාර්යෙන්ම අයි. ඕ. සී. සමාගම මෙම තීන්දු ගන්න අයට කොමිස් දෙවනවා.
තෙල් මිල මේ ආකාරයෙන් වැඩි වී තිබියදී ආණ්ඩුවේ ප්රධාන කරුණ බවට පත්වී තිබෙන්නේ මොකක්ද? ආණ්ඩුව කරන්නේ මුළු කොළඹම වහලා කාර් රේස් පදින එකයි. උසස් පෙළ සමතුන් ලක්ෂ 20ක් ඉන්නවා අපේ රටේ. ඔවුන් රැකියා විරහිතභාවයෙන් පෙළෙනවා. ගොවි අම්මා තාත්තගේ දරුවන් වගා කරන්න ඉඩමක් නැතිව ඉන්නවා. විශාල හැකියාවන් තිබෙන දූ පුතුන් ව්‍යාපාරයක් ආරම්භ කිරීමට මුදලක් නැතිව කාලය ගතකරනවා. මේ ආකාරයෙන් අපේ රටේ තරුණ පරපුර රැකියා විරහිතභාවයෙන් හිරකොට තිබෙනවා. ආණ්ඩුව විශාල ලෙස මුදල් වියදම් කරමින් රේස් පදිනවා. ආර්ථිකයට බලපාන කොළඹ නගරය මුළුමනින්ම වසා දමමින් රෙස් පදින ආණ්ඩුවක් මේක. එය විශාල ලෙස රටේ ආර්ථිකයට බලපානවා. සාමාන්‍යයෙන් ලෝකයේ රේස් සඳහා භාවිතා කරන්නේ වෙනම සකස් කර තිබෙන ධාවන පථ. නමුත් ලංකාවේ ආර්ථිකයට බලපාන නගරයක් වහලා කාර් රේස් පදිනවා.
2013 අයවැය කතාවේ කියනවා තරඟ සඳහා භාවිතා කරන විශේෂ වාහනවල නිෂ්පාදන බද්ද ඉවත් කරනවා කියලා. එහෙත් මෙම අයවැය ඉදිරිපත් කරන්නත් කලින් කාල්ටන් ක‍්‍රීඩා සමාජය විසින් රේසින් කාර් ඇණවුම් කරනවා. කාල්ටන් කියන්නේ මහින්ද රාජපක්ෂ පවුලේ බ‍්‍රෑන්ඞ් නේම් එකයි. ඒක රටේ කවුරුත් දන්නවා. මෙම ක‍්‍රීඩා සමාජය රාජපක්ෂ පුතුන්ගේ ක‍්‍රීඩා සමාජයයි. අයවැයෙන් බදු ඉවත් කරන බව මොවුන් කලින් දන්නවා. මුදල් ඇමති තාත්තා තමන්ගේ පුතුන්ට අයවැය රහස් හෙළිකරලා තිබෙනවා. මේකද ජනාධිපතිවරයාගේ හෘදසාක්ෂිය කියලා අපි අහනවා. ඔහු වැඩ කරන්නේ රටේ ව්‍යවස්ථාවට හෝ නීතියට අනුව නෙවෙයි. හෘදසාක්ෂියට අනුවයි. ඉතිං මේ හෘදසාක්ෂියට එකඟ දේවල්ද?
එම කාල්ටන් ක‍්‍රීඩා සමාජය විසින් රේසින් කාර් 19ක් ආනයනය කරනවා.
ලැම්බෝගිනි රේසින් කාර් 02යි, පෝෂේ රේසින් කාර් 1යි, ඉටියෝස් රේසින් කාර් 13යි, ඇස්ටන් මාර්ටින්, නිසාන් ෆෙයාර්ලේඞ් සහ හොන්ඩා සිවික් එක් රථය බැගින්.මෙම කාර්වල වටිනාකම රුපියල් ලක්ෂ 933ක් වෙනවා. ආසන්න වශයෙන් ගත්තොත් ඩොලර් ලක්ෂ 08ක් රටින් එළියට යනවා. නිෂ්පාදන බද්ද ඉවත් කර තිබෙන නිසා රුපියල් ලක්ෂ 2,000ක් බද්දෙන් නිදහස් වෙනවා. එම මුදල රටට අහිමි වෙලා තිබෙනවා. තමන්ගේ පුතුන් වෙනුවෙන් බදු සහනය රුපියල් ලක්ෂ 2,000ක්. මොන නායකයෙක්ද මේ. මොන රටක්ද මේ. රාජ්‍ය සේවකයින්ගේ වැටුප රුපියල් 2,500කින් වැඩිකරන්න ආණ්ඩුවට මුදල් නැහැ. ගොවියන්ගේ, ධීවරයින්ගේ ඉල්ලීම්වලට ඇහුම්කන් නොදෙන ආණ්ඩුවක්. අයවැය සහන දීලා තිබෙන්නේ තමන්ගේ පුතුන්ට.
නිෂ්පාදන බද්දට අමතරව අයකරනු ලබන වරාය හා ගුවන් සේවා බද්දත්, වරාය ගාස්තුත් එකතුව ගත්තාම රුපියල් ලක්ෂ 2,022 පමණ වෙනවා. නමුත් එම බදුවලින් කිසිදු මුදලක් ගෙවලා නැහැ. කාල්ටන් ක‍්‍රීඩා සමාජය කන්ටේනර් 04ක් සඳහා ගෙවා ඇති මුළු මුදල් රුපියල් 2,500ක් පමණයි. ඔවුන් රිංගා තිබෙන්නේ "කානේ" කියන සංචාරකයින් සඳහා ලබාදෙන රේගු නීතියෙන්. එම "කානේ" කියන නීතියට අනුව විදේශිකයෙක් ලංකාවට එනවිට තමන් පාවිච්චි කළ වාහනය ගෙන ඒමට පුළුවන්. ඒ සඳහා එම විදේශිකයා බැංකු තැන්පතුවක් ලෙස මුදල් තැන්පත් කළ යුතුයි. එය රේගුව විසින් අය කර ගන්නේ නැහැ. මාස 06ක කාලයක් ඇතුලත එම වාහනය නැවත මෙරටින් ගෙන නොගියොත් එම බැංකු තැන්පතුව රේගු ගාස්තු වශයෙන් අය කර ගන්නවා. එම නීතිය රිංගා තමයි මෙම රාජපක්ෂ පුතුන් රේසින් කාර් ආනයනය කරලා තිබෙන්නේ. මාස 06කින් පසුව කාල්ටන් සමාගම රේසින් කාර් කොහාටද ගෙනියන්නේ. රේගු අධ්‍යක්ෂවරයාට පුළුවන් ඒ සඳහා ලබාදෙන මාස 06ක කාලය දීර්ඝ කරන්න. මුදල් ඇමතිවරයාට ඒ සම්බන්ධයෙන් ඉල්ලීම් කරන්න පුළුවන්. ඉතිං කවුද මුදල් ඇමති. මහින්ද රාජපක්ෂ ජනාධිපතිවරයායි.
පසුගිය දිනෙක ජනාධිපතිවරයා විසින් කියා තිබුණා නීතිය කාටත් එකයි. ලොකු පොඩි බේදයකින් තොරව හැමෝටම නීතිය කි‍්‍රයාත්මක කළ යුතුයි කියලා. ඉන් දින කිහිපයකට පසුව ඔහුම කියනවා එන්. එස්. බී. එකේ සභාපති වංචාකාරී කොටස් ගණුදෙනුවකින් අමාරුවේ වැටුණා. නමුත් එහෙන් මෙහෙන් දාලා අපේ මිනිහා බේරගත්තා කියලා. ජනාධිපතිවරයා එහෙමයි තමන්ගේ මිනිස්සු බේරගන්නේ. එහෙම ජනාධිපතිවරයා තමන්ගේ පුතාලා වෙනුවෙන් මොනවා නොකරයිද?
මෙහිදී පැන නගින ප‍්‍රශ්න ගණනාවක් තිබෙනවා. රාජපක්ෂ පුතුන්ගේ කාල්ටන් ක‍්‍රීඩා සමාජයට රේසින් කාර් ගන්න ලක්ෂ 933ක් ලැබුණේ කොහොමද?
නාමල් රාජපක්ෂට ඒ තරම් මුදලක් කොහෙන්ද?
ඔහු සාමාන්‍ය උසස් පෙළ සමත් දරුවෙක් පමණයි. එහෙම කෙනෙක්ට කොයින්ද මේතරම් මුදලක් ලැබුණේ. ඒ වගේම ගෙන එන ලද රේසින් කාර් සඳහා රුපියල් ලක්ෂ 2,022ක කානේ නීතියට අනුව බැංකු තැන්පතුවක් තබන්නේ කොහොමද? මේ රහස් රටට හෙළි කළ යුතුයි. රේසින් කාර් තරඟාවලිය සඳහා ගාලූ පාර සම්පූර්ණයෙන් කාපට් කළා. ඒවාට මුදල් යෙදෙව්වේ කවුද? පාර දෙපැත්තට වැලි කොට්ට පමණක් ලක්ෂ 150ක් දාලා තිබෙනවා. මේවා රටේ සමස්ත ජනතාවගේ බදු මුදල් වලින් එකතු කරගන්නා සල්ලි. ගමේ දුප්පත් අම්මා තාත්තට ගහනවා පොළ බද්ද, ලොරි රථයකට වහලයක් ගැසූ විට රුපියල් 56,000ක් ලියාපදිංචි ගාස්තු ගන්නවා. 2013 අයවැයෙන් තරුණ තරුණියන්ගේ විවාහලියාපදිංචි ගාස්තු රුපියල් 1,000 සිට රුපියල් 5,000ක් දක්වා වැඩිකරා. පරණ උප්පැන්න සහතිකයක් ලබාගන්න ගිය විට රුපියල් 2,000ක් ගෙවිය යුතුයි. මේ ආකාරයෙන් ජනතාවට විශාල ලෙස බදු ගහලා හොයන මුදල් වියදම් කරමින් ඉන්නේ තමන්ගේ පුතාලට කාර් රේස් පදින්න.මේ ආකාරයේ මුග්ධ, කැත පාලනයක් තමයි මහින්ද රාජපක්ෂ ගෙන යමින් තිබෙන්නේ. අපේ රටේ ඉතාම පහත් අඩියට වැටී තිබෙන ආර්ථික අර්බුදය තව තවත් තීව‍්‍ර කරන්නේ මේ ආණ්ඩුව ගෙන යන වැරදි ආර්ථික කි‍්‍රයාමාර්ග වලින්. මේ රටේ තරුණ පරපුර මේ ආණ්ඩුවට එරෙහි විය යුතු නැද්ද? තමන්ට රැකියාවක් ලබාදෙන්න බැරි ආණ්ඩුවක්. තරුණයින්ගේ විවාහයෙන් බදුමුදල් එකතු කරන ආණ්ඩුවක්. මේවට එරෙහිව අරගල කළ යුතු නැද්ද? ජනාධිපතිවරයා කියා තිබෙනවා ඔහු මේ රටේ සියලු දෙනාගේ තාත්තා කියලා. ඒක මහ මුසාවක් පමණයි. ඔහු ඔහුගේ පුතුන්ගේ සහ තෝරාගත් තවත් කිහිපදෙනෙකුගේ තාත්තා පමණයි. ඔහු අනෙක් සියල්ලගේම බාප්පා පමණයි. එනිසා මේ බොරු, රැවටිලිකාරී ප්‍රෝඩාවන් වහාම රටට හෙළි කළ යුතුයි."