”මමයි සමිතයි ගායනා කළ හැම ගීතයකටම වගේ ගීත රසික රසිකාවියන්ගේ ආදරය නොමඳව හිමිවෙලා තියෙනවා. අපි දෙන්නා වෙන්වෙලා උන්නත් අපි දෙන්නා ගයන යුග ගීතවලට ඉස්සර වගේම තවමත් රසික රසිකාවියන් කැමැතියි. ඒ බව පසුගිය වකවානුවේ අපි ගැයූ ‘ආලෙන් වෙළාගන්න’ සහ ‘ඉවසයිද මන්දා’ ගීත දෙක අද ලබා තිබෙන ජනප්‍රියත්වයෙන්ම පැහැදිලි වෙනවා.” - -අතුල අධිකාරි
හිතඅස්සට හීන ගොඩක් ගෙනල්ල දුන්න
ඔය ඇස් දෙක අමතක කර හිඳින්නෙ කොහොම
සුළඟ වගේ මා අතහැර දුරක යන්නට
වරද මගේ රත්තරනේ කියලා දෙන්න...!
(පද – ආරාධනා ඒකනායක)
මෙම ගීත ජනප්‍රිය වී ඇත්තේ ඔබ දෙදෙනාගේ පෞද්ගලික අත්දැකීම් ඇසුරෙන් නිර්මාණය වී ඇති නිසා නොවේ ද..?
”නැහැ. ගීත රසවිඳින විට බොහෝ විට සිදුවන්නේ එය වින්දිතයාගේ අත්දැකීමක් වීමයි. ඔහුට හෝ ඇයට දැනෙනවා නම් තමන් රසවිඳින ගීතයේ සංකල්පනාව තමන්ගේම අත්දැකීමක් ලෙසින් බොහෝ දුරට එවැනි ගීත ඉක්මනින් ජනප්‍රිය වෙනවා. වර්තමානයේ ගීත රසික රසිකාවියන් වැඩි දෙනකුගේ සිත්වලට සමීප අත්දැකීම් මේ ගීත සංකල්පනාවල ඇතුළත් වීම හින්දාම මේ ගීත මෙතරම් ජනප්‍රිය වී ඇති බවයි මම නම් හිතන්නේ.”
ඔබ එහෙම හිතුවත් ඔබෙයි සමිතාගෙයි වෙන්වීමත් සමඟම මේ ගීත නිර්මාණය වීම නිසා ඇති වූ කුතුහලයත් මේ ගීත ජනප්‍රිය වීමට අනියම්ව බලපෑවේ නැද්ද..?
”තරමක් දුරට එලෙස වෙන්න ඇති. එහෙත් මේ ගීත ජනප්‍රිය වීමේ මූලික හේතුව එය විය නොහැකියි. මේ ගීත රසිකයින්ගේ හදවත්වලට දැනෙන සාර්ථක නිර්මාණ වීමයි එයට ප්‍රධාන හේතුව වී ඇත්තේ. විශේෂයෙන්ම ගීත සංකල්පනාවලට ගැළපෙන අයුරු සුදුසු තනු නිර්මාණය වී තිබීම නිසා ඉක්මනින්ම රසිකයින්ගේ හිත්වල මේ ගී රැඳුණා විය යුතුයි.”
‘ආලෙන් වෙළා ගන්න’ සහ ‘ඉවසයිද මන්දා’ යුග ගී නිර්මාණය වුණේ ඔබ දෙදෙනා වෙනුවෙන්ම නේද?”ඔය එක ගීතයක් වත් අපි වෙනුවෙන් ලියූ ගී නොවේ. ඔය වගේ අදහස් ඇතුළත් ගීත මීට ඉහතත් සමිතයි මමයි ගායනා කර තිබෙනවා. ‘ආලෙන් වෙළා ගන්න’ මුලින්ම ගායනා කරන්න උන්නෙත් වෙනත් ගායක ගායිකා යුවළක්. පසුව එය අපි දෙන්නාට ගායනා කරන්න ලැබුණා. ‘ඉවසයි ද මන්දා’ ඩිලාන් ගමගේ තරුණ ගී පද රචකයා ලියූ ඔහුගේම සංකල්පනාවක්. විරහ වේදනා මුසු වූ ගීත මේ රටේ කවදත් ගීතලෝලීන්ගේ හදවත්වලට ඉක්මනින්ම සමීප වෙනවා.”
ඔබ දැන් වැඩිපුර නිර්මාණ කරන්නේ නව පරපුරේ නිර්මාණකරුවන් සමඟද..?
”පසුගිය වකවානුවේ මා වැඩිපුර නිර්මාණ කෙරුවේ අලුත් පරපුරේ නිර්මාණකරුවන් සමඟ තමයි. ‘ඉවසයිද මන්දා’ පද රචකයා ඩිලාන් වගේම සංගීතවත් කළ උදාර සමරවීර නව පරපුරේ. ‘හිත අස්සට හීන ගොඩක්’ පද රචිකාවිය ආරාධනාත් එහි තනු නිර්මාණය කර ඇති මල්ක මල්ලවත් නව පරපුරේ. නවක ගායිකාවක් වන නිර්මලී බෙන්ස් සමඟ ‘රෝස යායෙ රෝස කෙල්ල රෝස මාවතේ’ නමින් ගීතයකුත් ගායනා කළා. ළඟදීම ඒ ගීතයට මියුසික් වීඩියෝවකුත් කෙරෙනවා. ‘දෙරණ ඩ්‍රීම්ස් ස්ටාර්ස්’ සංගීත මෙහෙයවීම් කටයුතු කරන අතරේදීත් මේ ක්ෂේත්‍රයේ නව පරම්පරාව සමඟ කටයුතුª කරන්න අවස්ථාව ලැබෙනවා.”
ඉදිරියේ දී ඔබ සමිතා සමඟ ගයන යුග ගී රසිකයින්ට අසන්න නොලැබෙයිද?
”ගීතලෝලීන්ගේ ආදරය හිමි වෙන තුරු අපේ යුග ගී ඔවුන්ට අහන්න ලැබෙනවා. අපි වෙන්වුණාට ගායක ගායිකා යුවළක් ලෙස ගීතලෝලීන් අපෙන් යුග ගී බලාපොරොත්තු වෙනවා නම් අප දෙන්නා ගයන යුග ගී ඉදිරියේදීත් නිර්මාණය කෙරේවි.”
2013 වසරේ ඔබේ ගීත එකතුවක් එළිදකින්නේ නැද්ද..?”මගේ ගීත ඇල්බමයක් කරනවා. ‘පාරාදීසේ’ වැනි මගේ එදා ගීත සමඟ අලුත් ගීත කිහිපයකුත් ඒ ඇල්බමයට ඇතුළත් වෙනවා. මේ දිනවල එම පටිගත කිරීම් කටයුතුත් කරගෙන යනවා.”
අමායා සමඟ ගෙවන ජීවිතේ කොහොමද?
”හොඳයි. අපි සතුටින් ජීවත් වෙනවා.”
උපුටා
ගැනීම - සිළුමිණ