මත්පැන්, දුම්වැටි සහ ලිංගික ක්‍රියාකාරීත්වය අතර ඇති සම්බන්ධතාවය කුමක්‌ද? මේ සම්බන්ධව බොහෝ දෙනා බොහෝ අදහස්‌ පළ කරනවා. එම අදහස්‌ වල විද්‍යාත්මක සත්‍ය අසත්‍යතාවය ගැන කතාබහ කරන්න මෙවර අපි අවධානය යොමු කළෙමු.මත්පැන් හා දුම්වැටි භාවිත කරන පුද්ගලයකුගේ ශරීරයට ඇතිවන බලපෑම් අතර ලිංගිකත්වය සහ ලිංගික ක්‍රියාකාරිත්වයට ඇතිවන බලපෑමද වැදගත් වේ. ශ්‍රී ලංකාවේ සැලකිය යුතු පිරිසක්‌ තවමත් මත්පැන් සහ දුම්වැටි භාවිත කරන නිසා මෙය අප කතාබහට ලක්‌ කළ යුතුමය.
සමීක්ෂණ වාර්තාවලට අනුව ශ්‍රී ලාංකීය පිරිමින්ගෙන් 40%ක්‌ පමණ දුම්පානය කරති. කෙසේ වෙතත් වාසනාවකට අප රටේ දුම්පානය අඩුවෙමින් පවතී. දුම්පානය නිසා ලිංගික බෙලහීනතාවද ඇතිවන බව ඉතා පැහැදිලිය. ඊට අමතරව දුම්පානය නිසා දත් දුර්වර්ණ වීම, සමේ නිරෝගී බවට හානි සිදුවීම, දුම්වැටි ගඳ වැනි කරුණු නිසාද ලිංගික ආකර්ෂණය මෙන්ම ක්‍රියාකාරිත්වයටද අනිසි බලපෑම් ඇතිවිය හැකිය. අප රටේ කාන්තාවන් අතර දුම්පානය සුලබ නොවුවත් අලුත් සමීක්ෂණ වර්තා අනුව දුම්පානය නිසා කාන්තාවන්ගේ ලිංගික අවයවවල සංවේදී භාවය අඩුවීමට සහ ලිංගික ආකර්ෂණය අඩුවීමට හැකියාව ඇති බව සොයාගෙන ඇත.
මීට අමතරව දුම්පානය නිසා ඇතිවන හෘදයාබාධ, මුඛ පිළිකා හා පෙනහලු පිළිකා ආදි රෝගී තත්ත්වයන් නිසා ලිංගික ක්‍රියාකාරිත්වය අඩපණ විය හැකිය.
මත්පැන් නිසා ලිංගිකත්වයට ඇතිවන බලපෑම් සංකීර්ණය. මත්පැන් ගන්නා ප්‍රමාණය අනුව එහි බලපෑම වෙනස්‌ විය හැකිය. එම බලපෑම කෙටි කාලීන සහ දිගු බලපෑම් වශයෙන් වෙන්කළ හැකිය.
මත්පැන් පානය කිරීමෙන් පසු ලිංගික ක්‍රියාකාරිත්වය අඩු වේ. නමුත් ඇතැම් අයගේ ලිංගික ආශාව වැඩිවිය හැකිය. ලිංගික ක්‍රියාකාරිත්වය පිළිබඳ පවතින ගැටලු නිසා ආතතියෙන් පෙළෙන අයකු මත්පැන් සුළු ප්‍රමාණයක්‌ පානය කිරීමෙන් පවතින ආතතිය අඩුවීම නිසා ලිංගික ක්‍රියාකාරිත්වයේ යම් වර්ධනයක්‌ පෙන්විය හැකිය. නමුත් මෙහි භයානකකම වන්නේ ඉන් මත්පැන් පානයට ඇබ්බැහි වීමේ අවදානමක්‌ තිබීමයි.
මීට අමතරව මත්පැන් නිසා ලිංගික උත්තේජනය සහ එහි වින්දනීය ස්‌වභාවය අඩුවීමක්‌ ඇතිවේ. සුරාන්තයද පමා වීමක්‌ සිදුවේ.
මීට අමතරව මත්පැන් නිසා අවදානම් ලිංගික හැසිරීම්වලට යොමු වීමටත් ඇති ඉඩකඩ වැඩිය. ඉන් සමාජ රෝගවලට ගොදුරු වීමක්‌ දැකිය හැකිය.
එසේම මත්පැන් පානය කර සිටින තම ස්‌වාමියාගෙන් නිකුත් වන මත්පැන් දුගඳ, ශාරීරික ක්‍රියාකාරිත්වයේ හා හැසිරීමේ වෙනස නිසාද බොහෝ භාර්යාවෝ මත්පැන් භාවිත කර එන තම ස්‌වාමි පුරුෂයන් හා ලිංගිකව එක්‌ වීමට ප්‍රිය නොකරති. මත්පැන් පානයෙන් පසු ඇතිවන නොමනා හැසිරීම්, මත්පැන් නිසා ඇතිවන ආර්ථික ගැටලු නිසාත් පවුල් ජීවිතයේ විවිධ අර්බුද මතුවිය හැකිය. මෙවැනි පවුලකට සාර්ථක ලිංගික ජීවිතයක්‌ පවත්වා ගැනීමට අපහසුය.
දිගින් දිගට අධික ලෙස මත්පැන් පානය නිසා පිරිමින්ගේ පුරුෂ බව සහ ලිංගිකත්වය සඳහා වැදගත් වන ටෙස්‌ටොස්‌ටෙරොන් හෝමෝනය නිෂ්පාදනය අඩපණ වේ. මේ නිසා ගැටලු රාශියක්‌ ඇතිවේ. සාර්ථක ප්‍රීතිමත් ලිංගික ජීවිතයකටත් අඹු සැමියන් අතර පවතින සම්බන්ධයකටත් මත්පැන් සහ දුම්වැටි විවිධාකාරයෙන් හානිකර විය හැකිය.
ලිංගික ගැටලු පිළිබද විශේෂඥ වෛද්‍ය
ලසන්ත මලවිගේ