හිනිදුම පොලිස්‌ වසමේ මල්හතාව ප්‍රදේශයේ පදිංචි වයස අවුරුදු 8 ක්‌ සහ 12 ක්‌ වයසැති කුඩා දැරියන් දෙදෙනකු එකම දිනයේ බරපතළ ලිංගික අපයෝජනයට ලක්‌කළ 40 හැවිරිදි විවාහකයකු හිනිදුම පොලිසිය විසින් අත්අඩංගුවට ගෙන බද්දේගම මහෙස්‌ත්‍රාත් අධිකරණය වෙත ඉදිරිපත් කළ අතර මහෙස්‌ත්‍රාත් මහින්ද පිණිදිය මහතා ඔහු ලබන 14 වැනිදා දක්‌වා රක්‍ෂිත බන්ධනාගාරගත කළේය.
සැකකරු පදිංචි නිවස ආසන්නයේ තවත් කුඩා පිරිමි ළමුන් දෙදෙනකු සමඟ සෙල්ලම් කරමින් සිටි දැරියන් දෙදෙනකු නූඩ්ල්ස්‌ කෑමට යෑයි පවසා නිවස තුළට ගෙන දෙදෙනාටම අතවර කොට ඇති බව පරික්‍ෂණවලදී හෙළිවී ඇත.
දෙනියාය පල්ලේගම ප්‍රදේශයේ පදිංචි සැකකරු විවාහක බිරිඳ අතහැර දමා ගාල්ල ප්‍රදේශයේදී හාදකරගත් වෙනත් කාන්තාවක සමඟ හිනිදුම ප්‍රදේශයේ ජීවත් වී ඇති බවත් කාන්තාව පිටතට ගොස්‌ සිටි අවස්‌ථාවක ඔහු මෙම අතවරය සිදුකොට ඇති බවත් අනාවරණය වී ඇත.
හිනිදුම පොලිස්‌ ස්‌ථානාධිපති පො.ප. සනත් රංජිත් ලියනගේ, උ.පො.ප. අමරදිවාකර, සැරයන් ශාන්ත උදය (28099) සහ උ.පො.ප. චතුරි අසංකා, සැරයන් නිශාන්ති යන නිලධාරීහු මේ පිළිබඳ පරීක්‍ෂණ පවත්වති.