සිංහල බෞද්ධ ජාතිය නඟා සිටුවීමේ අරමුණින් අවම වශයෙන් දරුවන් පස් දෙනෙකුවත් සිටින සෑම සිංහල බෞද්ධ පවුලකට රුපියල් 25,000/- ක මුදලක් ලබා දීමට ‘මව්බිම’ සුරැකීමේ සංවිධානය තීරණය කර ඇත. ඒ අනුව දරුවන් පස් දෙනෙකු හෝ ඊට වැඩියෙන් සිටින පවුල් පිළිබඳ දිස්ත්‍රික් මට්ටමෙන් සොයා බැලීමේ පුළුල් සමීක්ෂණයක් දැනටමත් ආරම්භ කර ඇතැයි සංවිධානයේ සභාපති පූජ්‍ය මුරුත්තෙට්ටුවේ ආනන්ද හිමි සඳහන් කළහ. මේ වන විට සිංහල බෞද්ධ ජන කොටස්වල වර්ධනය සීග්‍ර පසුබෑමක් දක්නට ලැබෙන බැවින් වසර කිහිපයකින් සිංහල ජාතිය වඳ වී යාමේ තර්ජනයක පෙර නිමිත්තක් දකින්නට ලැබෙන බවද ආනන්ද හිමියන් සඳහන් කළහ.
මෙම මුදල් පරිත්‍යාග කිරීම සඳහා දැනටමත් අරමුදලක් ආරම්භ කර ඇති අතර ඒ සඳහා පරිත්‍යාගශීලින්ට දායක විය හැකි බවද ‘මව්බිම’ සුරැකීමේ සංවිධානය සඳහන් කර සිටී.