පොලිසියේ ඉහළ නිලධාරීන්ගේ පෞද්ගලික ලිපිගොනු සහ ඔවුන්ගේ අදාළ වෙනත් ලියකියවිලි හදිසි පරීක්‍ෂාවකට ලක් කිරීමට ආරක්‍ෂක අමාත්‍යංශය තීරණය කර තිබේ.
මෙහි මූලික අදියර යටතේ පොලිස් අධිකාරිවරුන්ගේ සිට ඉහළ තනතුරු දරන නිලධාරීන්ට අදාළ ලිපිගොනු අපරාධ පරීක්‍ෂණ දෙපාර්තමේන්තුව මඟින් විශේෂ පරීක්‍ෂාවකට භාජන කිරීමට නියමිතය.
නියෝජ්‍ය පොලිස්පති වාස් ගුණවර්ධන මහතාට එරෙහිව කප්පම් සහ මිනී මැරුම් චෝදනා එල්ල වීමත් සමඟ පොලිසියේ තවත් ඉහළ නිලධාරීන් පිරිසකගේ දූෂණ - අක්‍රමිකතා සම්බන්ධයෙන් ආරක්‍ෂක අමාත්‍යංශයේ විශේෂ විමර්ශන ඒකකයට තොරතුරු රැසක් ලැබී තිබේ.එම විශේෂ විමර්ශන ඒකක ආරංචි මාර්ග සඳහන් කරන ආකාරයට මේ ඉහළ පොලිස් නිලධාරීන් පහළ තනතුරුවල සිටියදී සම්බන්ධකම් පැවැත්වූ පාතාල නායකයන් සහ විවිධ නීති විරෝධී ව්‍යාපාරවල යෙදෙන ජාවාරම්කරුවන් සමඟ තවදුරටත් සම්බන්ධකම් පවත්වන බව හෙළිදරව් වී තිබේ.