ඉකුත් දින කිහිපය මුළුල්ලේ ඇය උණ රෝගයෙන් පෙළෙමින් සිට ඇත. එහෙත් ළඟදී විභාගය පැවැත්වෙන නිසා අදාළ ප්‍රගති පැවරුම් සකස් කිරීමට ඇය දිගටම නීති පීඨයේ නේවාසිකව රැදී ඇත. ඉකුත් 30 වැනිදා නිසංසලා, නීති පීඨ නේවාසිකාගාරයේ නාන කාමරයේ සිහි නැතිව ඇද වැටී ඇත. සෑහෙන වේලාවක් ඇය සිහිසුන්ව නාන කාමරයේ වැටී සිටියදී මිතුරියන් විසින් සොයා ගෙන වහාම කොළඹ ජාතික රෝහලේ දැඩි සත්කාර ඒකකයට ඇතුලත් කර තිබේ. ඉන්පසු නීති පීඨයේ අධිකාරිය විසින් සිදු කළ පරික්ෂණයකදී නේවාසික ගොඩනැගිල්ලේ ඩෙංගු මදුරු කීටයන් විශාල ප්‍රමාණයක් සොයා ගෙන ඇත.
නීති පීඨ ශිෂ්‍ය සංගම් සභාපති සජිත් මිහිර බණ්ඩාර ශිෂ්‍යයා සිද්ධිය සම්බන්ධයෙන් කරුණු දැක්වූයේ මෙසේය.
“පසුගිය මාස දෙක තුළ නීති පිඨයේ හා නේවාසිකාගාරයෙන් ඩෙංගු රොගී සිසු සිසුවියන් විසි දෙනෙකු පමණ හමුවුණා. මේ සම්බන්ධව පාලන අධිකාරියට දැනුම් දුන්නා. නමුත් නිසංසලා ප්‍රියන්ති සිසුවිය සිහි නැතිව නාන කාමරයේ ඇද වැටෙන තුරු පාලන අධිකාරිය ගත් පියවරක් පෙනුනේ නෑ.” රෝහලට ඇතුළත් කරන ලද නිසංසලා ප්‍රියන්ති සමරසිංහගේ එක් කනකින් රුධිරය වහනය වූ බවත්, ඊට පුළුන් කැබැල්ලක් තබනු දුටු බවත් එම අවස්ථාවේ රෝහලේ නිසංසලා සමග සිටි මිතුරියන් තමන්ට පැවසූ බවත් සජිත් මිහිර බණ්ඩාර පවසයි.
මේ අතර මදුරුවන් බෝවන ස්ථාන පිරිසිදු කිරීම සඳහා අද සිට දින 3ක් කොළඹ විශ්වවිද්‍යාලයේ පීඨ තුනක දේශන හා විභාග කල් දමා තිබේ.එහි උපකුලපති කුමාර හිරිඹුරේගම මහතා පැවසුවේ, ඒ අනුව ශ්‍රාස්ත්‍ර පීඨය, කළමනාකරණ හා නීතිපීඨවල දේශන හා විභාග කල්දමා ඇති බව ය.එම කාලය තුළ විශ්වවිද්‍යාල භූමිය දූමායනය කිරීමට ද නියමිත ය.
මීට අමතරව නීති පීඨයේ ඩෙංගු මදුරු කීටයන් හමුවූ ගොඩනැගිල්ලේ වහලය ප්‍රතිසංස්කරණය කිරීමට සැලසුම්කර ඇති බව උපකුලපතිවරයා සඳහන් කළේ ය.
විශ්වවිද්‍යාලයේ නීතිපීඨ ගොඩනැගිලි තුළ ඩෙංගු මදුරු කීටයින් සොයා ගැනීමත් සමඟ එම පීඨය තාවකාලිකව වසා දමන ලෙස කොළඹ මහ නගරසභාව පෙරේදා නිර්දේශයක් නිකුත් කර තිබිණ.
*A female student of the law faculty of the Colombo University died this morning at the National Hospital after contracting dengue.