අනුර බණ්ඩානායක මහතා ජීවතුන් අතරේ සිටියදී ඔහු සමීපයේ සිටි අතරමැදි පුද්ගලයන් හතර දෙනෙක් අද (03) ඒ මහතාගේ බූදලය සම්බන්ධ නඩුවේදී පවසා සිටියේ තමන්ටත් එම බූදලයෙන් කොටසක් අයත් බවකි. බණ්ඩානායක මහතා ජීවතුන් අතරේ සිටියදී අන්තීම කැමැති පත්‍රයෙන් ඔහු ඒ බව ලියා තැබූ බව ඔවුන් පැවසූහ.මියගිය අනුර බණ්ඩානායක මහතාගේ බූදලය සම්බන්ධ නඩුව අද (03) සිවිල් අභියාචනාධිකරණ විනිසුරුවරුන් වන සී.ජේ.මඩවල හා එල්.ටී.බී. දෙහිදෙනිය යන මහත්වරුන් හමුවෙහි කැඳ වූ අවස්ථාවේ දී මේ බව අනාවරණය විණ.
මෙම අවස්ථාවේ දී හිටපු ජනාධිපතිනි චන්ද්‍රිකා බණ්ඩානායක සහ සුනේත්‍රා බණ්ඩාරනායක යන මහත්මීන් අධිකරණය හමුවෙහි පවසා සිටියේ එසේ ලියුවා යැයි කියන අන්තීම කැමැති පත්‍රය අනුර බණ්ඩානායක මහතා විසින් ඔහු ජීවත් වී සිටියදී ම ඉරා දැමූ බවයි.
අතරමැදි පෙත්සම්කරුවන් පවසා සිටියේ අන්තීම කැමැති පත්‍රයේ පිටපතක් තමන් සන්තකයේ තිබෙන බවයි. වැඩිදුර විභාගය නොවැම්බර් මස 11 වැනිදාට කල් තැබිණ. නීතිඥ රොමේෂ් සිල්වා, සුනිමල් කුරේ, හේමන්ත බොතේජු, තිළිණි, උපාලි සංජීව යන මහත්වරුන් පෙත්සම්කරුවන් වෙනුවෙන් පෙනී සිටියහ.