පෞද්ගලික බස්‌ ගාස්‌තුව ලබන මස (සැප්තැම්බර්) පළමුවැනිදා සිට ඒක පාර්ශ්වික ලෙස 10% කින් ඉහළ දැමීමට තීරණය කළ බව ලංකා පෞද්ගලික බස්‌ හිමියන්ගේ සංගමයේ සභාපති ගැමුණු විඡේරත්න මහතා ඊයේ (12 වැනිදා) පැවසීය.එහිදී දැනට පවතින අවම බස්‌ ගාස්‌තුව වන රුපියල් නවය රුපියල් දහය දක්‌වා වැඩි වන බව ද හෙතෙම කීය.
බස්‌ ගාස්‌තුව ඉහළ දැමීම සඳහා ජාතික ප්‍රතිපත්තියක්‌ පැවතුණ ද එය මේ වන විට බල රහිත වී ඇති බව ද ගාස්‌තු සංශෝධනය සඳහා ජාතික ගමනාගමන කොමිෂන් සභාවට බලයක්‌ නොමැති බැවින් මෙලෙස ඒකපාර්ශ්විකව ගාස්‌තු වැඩි කිරීමට තීරණය කළ බව ද හෙතෙම කීය.නීති උපදෙස්‌ ලබාගනිමින් මෙලෙස බස්‌ ගාස්‌තුව වැඩි කරන බව කී ඒ මහතා ගාස්‌තුව 10% කින් ඉහළ නොදැමුවහොත් පෞද්ගලික බස්‌ කර්මාන්තය කඩාවැටීමේ අවදානමක්‌ පවතින බව ද කියා සිටියේය.
මෙම වැඩි කිරීම සම්බන්ධව කිහිපවිටක්‌ම ජාතික ගමනාගමන කොමිෂන් සභාවට දන්වා සිටිය ද එම කොමිෂන් සභාවෙන් මෙතෙක්‌ කිසිදු ප්‍රතිචාරයක්‌ නොලැබුණු බව ද නාරාහේන්පිටදී ඊයේ පැවති මාධ්‍ය හමුවේදී ගැමුණු විඡේරත්න මහතා සඳහන් කළේය.බස්‌ ගාස්‌තු අවස්‌ථා 305 ක්‌ පවතින අතර මෙම නව වැඩිවීම් එම අවස්‌ථා සියල්ලටම බලපායි. අවම ගාස්‌තුව රුපියල් නවයේ සිට දහය දක්‌වා වැඩිවන විට දැනට පවතින උපරිම ගාස්‌තුව වන රුපියල් 662 රුපියල් 728 දක්‌වා වැඩි වනු ඇත.
දැනට පවතින බස්‌ ගාස්‌තුව ලබන මස 01 වැනිදා සිට ක්‍රියාත්මක වන පරිදි පහත අයුරින් වැඩිවන බව ද ගැමුණු විඡේරත්න මහතා වැඩිදුරටත් කීය.
