කොළඹ ප්‍රදේශයේ රැකියාවන් කරන බව නිවෙස්වලට හඟවා කොළඹ මරදාන ප්‍රදේශයේ නවාතැන්පළක පවත්වාගෙන ගිය ගණිකා නිවාසයක සිටි විවාහක කාන්තාවන් අතරින් එක් කාන්තාවක් පස් මසක ගැබිනියක් බව පොලිස් පරීක්ෂණවලදී හෙළිවී තිබේ.එම ස්ථානයේ සිටි කාන්තාවන් 08 දෙනකු සැකපිට පොලිස් අත්අඩංගුවට ගෙන ඇත.
පොලිස් මූලස්ථානයේ සංවිධානාත්මක අපරාධ හා දූෂණ මර්දන ඒකකයේ විශේෂ පොලිස් කණ්ඩායමක් විසින් මාලිගාකන්ද අධිකරණයෙන් ලබාගත් සෝදිසි වරෙන්තුවක් මත මෙම ගණිකා නිවාසය වටලා එම කාන්තාවන් අත්අඩංගුවට ගෙන තිබේ.පොලිසිය විසින් උපාය දූතයකු යොදවා කරන ලද පරීක්ෂණයේදී හෙළිවී ඇත්තේ මෙම කාන්තාවන් රුපියල් 2000කට අලෙවි වන බවයි.එම ස්ථානයේ සිටි පස් මසක ගැබිනියක පවසා ඇත්තේ ඇගේ විවාහක සැමියා ඇය අතහැර ගොස් ඇති බවයි.එම ස්ථානයේ සිටි කාන්තාවන් අවුරුදු 24 සිට 40 දක්වා වූ වයස් සීමාවන්වල අය බවද පොලිසිය පැවැසීය.
එම කාන්තාවන්ගෙන් වැඩි දෙනකු කලවංචිකුඩි, එරාවුර් යන ප්‍රදේශවල අය බවත් එක් කාන්තාවක් පමණක් ජාඇල ප්‍රදේශයේ පදිංචිකාරියක බවත් හෙළිවී තිබේ.මෙම සැකකාරියන් මාලිගාකන්ද අධිකරණයට ඉදිරිපත් කිරීමෙන් පසු ලබන 23දා දක්වා රක්ෂිත බන්ධනාගාර ගතකොට
ඇත.