ශ්‍රී ලංකාව තුළ ළමා විවාහවීම් ප්‍රවණතාව ක්‍රමයෙන් ඉහළ යැමේ තත්ත්වයක්‌ දකින්නට ඇතැයි යුනිසෙෆ් සංවිධානය නිකුත් කළ නවතම වාර්තාවේ සඳහන් වේ. දැරියන් කුඩා අවධියේ සිටම විවාහවලට එළැඹීමේ නැඹුරුව සහ එයට හේතුවන කරුණු පිළිබඳව යුනිසෙෆ් සංවිධානය කළ සමීක්‍ෂණය සඳහා අඩු වයසින් විවාහයට පත්වූ දැරියන් 71 දෙනෙකු සහභාගි කරවාගෙන ඇත. ඔවුන්ගෙන් සියයට තිහක්‌ පමණ අවුරුදු 18 ට අඩු මව්වරු බව සමීක්‍ෂණයේ තොරතුරුවලින් අනාවරණය කර ගැනීමට හැකිවී ඇති බව එම සංවිධානය පවසයි.
මේ යටතේ විශේෂයෙන් සංවර්ධනය අඩු මට්‌ටමක පවතින පොළොන්නරුව ඇතුළු දිස්‌ත්‍රික්‌කවල මෙම තත්ත්වය බහුලව දකින්නට ඇති බව එම සංවිධානය පෙන්වා දෙයි. බොහෝ දරුවන් අඩු වයස්‌ විවාහවලට පත්වීමට මූලික හේතුව වී ඇත්තේ ඔවුන් විවිධ අයුරින් ලිංගික ලෙස අපයෝජනයන්ට ලක්‌වීමයි.
මේ අයුරින් අඩු වයසින් විවාහවීම හා ගැබ් ගැනීම් නිසා එම දරුවන්ගේ අධ්‍යාපනය ඇනහිටීම සමාජය ඉදිරියේ ඒ අයගේ තත්ත්වය පහළ වැටීම හා ඔවුන් වැඩියෙන් ගෘහස්‌ථ ප්‍රචණ්‌ඩත්වයට ලක්‌වීම ආදී අතුරු විපාකයන්ටද මෙම දරුවන් මුහුණ දෙන බව යුනිසෙෆ් සංවිධානය මෙම සමීක්‍ෂණය මගින් අනාවරණය කරගෙන ඇත.