බල්ලන් 7ක් සමග කාන්තාවක් රැයක් පුරා මොටර් රථයක

බල්ලන් හත් දෙනකු සමඟ සුඛෝපභෝගී මෝටර් රථයක රැයක් පහන් කළ සුරූපී කාන්තාවක් මාතර නගරයම කැලැඹූ පුවතක් මාතර වල්ගම ප්‍රදේශයෙන් වාර්තා වෙයි.

ඉකුත් 25 වැනිදා රාත්‍රිය එළැඹෙත්ම මාතර ගාල්ල ප්‍රධාන මර්ගයේ වල්ගම මංසන්ධියට නුදුරින් කාර් රථයක් නවතා තිබිණි. පැය කිහිපයක් නවතා තිබූ කාර් රථය තුළ බලු රෑනක් ඒ මේ අත දුව පනිනවා දුටු ගම්මුන් විමසුම් ඇසින් කාර් රථය අසලට ළඟාවන විට කාර් රථය තුළ කාන්තාවක් ද සිටිනු දැක ඇත. මෙම කාන්තාව වීදුරුව මඳක් පහත් කරත්ම රථය තුළ සිටි බල්ලන් රෑනක් එක රොත්තට ගම්මුන්ට නොනවත්වා බුරන්නට පටන්ගෙන ඇත. එහෙත් රථය තුළ සිටි කාන්තාව ගම්මුන් සමඟ එක් වචනයක් හෝ කතා නොකර කාර් රථයේ වීදුරුව යළි වසා ඇත.

මෙම අරුම පුදුම සිදුවීම පැය කිහිපයක් බලාසිටි ගම්මුන්ට කිසියම් සැකයක් පහළ වීම නිසාවෙන් කාන්තාවට නොදැනෙන ලෙස කාරයේ රෝදවල හුළං යවා මේ පිළිබඳ පොලිසියට දැනුම් දී ඇති බව වාර්තා වෙයි.

බෞද්ධයන්ට අපහාස කළ 'ටයිම්' සඟරාව ලංකාවේ තහනම්

මියැන්මාරයේ ආන්දොලනාත්මක භික්ෂුවක් වන විරාතු හිමියන් නායකත්වය දෙන ‘Buddhist -969’ නම් සංවිධානය ශ්‍රී ලංකාවේ 'බොදු බල සේනා' සංවිධානයට සමාන කරමින් පළ කර ඇති ආන්දෝලනාත්මක ලිපියක් හේතුවෙන් සුප්‍රසිද්ධ ජාත්‍යන්තර 'ටයිම්' සඟරාවේ ජූලි කලාපය මුදා හැරීම රේගුවෙන් අත්හිටුවනු ලැබ තිබේ.Time සඟරාවේ ජූලි කලාපයේ මුල්පිටුවේ පූජ්‍ය විරාතු හිමියන්ගේ රුව The Face of Buddhist Terror බෞද්ධ ත්‍රස්තවාදයේ මුහුණුවර යන වැකිය සහිතව පළ කර ඇති අතර ඒ හේතුව නිසා සඟරාව මියැන්මාරය තුළද තහනම් කරන්නට මියැන්මාර රජය පියවර ගෙන තිබේ.

මියැන්මාරයේ විරාතු හිමියන් නායකත්වය දෙන Buddhist -969 සංවිධානය එරට සුළු ජනකොටසක් වන මුස්ලිම්වරුන්ට විරුද්ධව බරපතළ ව්‍යාපාරයක් ගෙන යන බව පැවැසෙන අතර මේ හේතුවෙන් මියැන්මාරය පුරා පසුගිය වසරේ පමණක් 1,40,000කට ආසන්න බෞද්ධ හා මුස්ලිම් වැසියන් පිරිසක් අවතැන්වී ඇතැයිද පුද්ගලයන් 200කට අධික පිරිසක් මරණයට පත්ව ඇතැයිද පැවැසේ.

මියගියවූවන්ගෙන් බහුතරය එරට මුස්ලිම් වැසියන් බවත් Buddhist -969 සංවිධානය විසින් සුළු ජාතික මුස්ලිම්වරුන්ගේ පල්ලි, ව්‍යාපාරික ස්ථාන හා දේපළවලට පහරදී සංවිධානයේ පත්‍රිකා හා ස්ටිකර් අලවා යන බවත් වෝල් ස්ටි්‍රට් ජර්නල් පුවත්පත වාර්තා කර තිබේ.

හැම තිස්සෙම හිනාවෙලා ඉන්නයි මම කැමැති - Ashika Manasinghe

‘හේඩි’ සුන්දර යුවතියකි. එහෙත් ඇය ආබාධිතයි. සිරුරින් ආබාධිත වුණත් ඇයගේ සිත ශක්තිමත්. ඒ නිසාම ඇයට ජීවිතය ජයගන්න හැකි වෙනවා. ස්වාධීන රූපවාහිනියෙන් විකාශය වන ‘හේඩි’ ටෙලි නාට්‍යයේ හේඩිගේ චරිතය නිරූපණය කරන්නේ යොවුන් රංගන ශිල්පිනී අශිකා මනසිංහ. අද අප එක්කර ගන්නේ ඇයයි.

කොහොම ද ‘හේඩි’ ට ලැබෙන ප්‍රතිචාර?

දැන් මට හැමෝම කතා කරන්නේ හේඩි කියලා. මගතොටේ දී හමුවන අයත් ක්ෂේත්‍රයේ අයත් වෙඩින් එකක් වගේ උත්සවයක ගියාම හමුවන අයත් මට කියන්නේ හේඩි කියලා. ඒකෙන් තේරෙනවා ඒ චරිතයට සමාජයේ ගොඩක් දෙනෙක් ආදරය කරන බව.

කොහොමද ඔබ හේඩි ටෙලි නාට්‍යයට සම්බන්ධ වුණේ?

දවසක් සංජය නිර්මාල් අයියයි එයාගෙ නෝනයි අපේ ගෙදරටම ඇවිත් මේ ටෙලි නාට්‍යයේ පිටපත දුන්න. එදා ඔවුන් මට කතාව ටිකක් පහදල දුන්නා.

පිටපත ‍කියෙව්වට පස්සෙ මට හරිම ආශාවක් ආව මේ චරිතය කරන්න. ඒ මොකද මම දැනට කලාවට සම්බන්ධ වෙලා කලක් ගත වුණත් කාටත් දැනෙන විදියේ චරිතයක් කරන්න ලැබුණේ නෑ. ඒ ආශාව ‘හේඩි’ ටෙලි නාට්‍යයෙන් ඉටුකරගන්න ලැබුණා. ඒකට මම ස්තූතිවන්ත වෙන්නේ ‘හේඩි’ අධ්‍යක්ෂතුමාට.

මැන්ඩෙලා ගැන අවසන් තීරණය පවුලේ අය අතේ

දකුණු අපි‍්‍රකා හිටපු ජනාධිපති නෙල්සන් මැන්ඩෙලා සති දෙකකට ආසන්න කාලයක් සිහිසුන්ව දිවි සුරැකීමේ යන්ත‍්‍රයකට සම්බන්ධ කරනු ලැබ සිටින බැවින් ඔහු ගැන අවසන් තීරණයක් ගත යුත්තේ ඔහුගේ පවුලේ අය යැයි වෛද්‍යවරු පවසති.

 මැන්ඩෙලාට ප‍්‍රතිකාර කරන ජොහැන්නස්බර්ග් නුවර වෛද්‍යවරුන් පවසන්නේ, සිහිසුන්ව සිටින මැන්ඩෙලා මේ වනවිට ජීවත් වන්නේ එම යන්ත‍්‍රයේ ආධාරයෙන් බවත් කොතරම් කල් ගියත් ඔහුගේ තත්ත්වය යහපත් නොවනු ඇති බවත්ය. දිවි සුරැකුම් යන්ත‍්‍රය අකි‍්‍රය කර ඔහුට මිය යෑමට ඉඩ දෙන්නේ නම් එය තීරණය කළ යුත්තේ ඔහුගේ පවුලේ අය බව වෛද්‍යවරුන් ප‍්‍රකාශ කළේ ඊයේ (27) විශේෂ මාධ්‍ය හමුවක් පවත්වමිනි. දකුණු අපි‍්‍රකාවේ වර්ණභේදවාදය තුරන් කිරීමේ පුරෝගාමියා ලෙස කටයුතු කළ නෙල්සන් මැන්ඩෙලා (94) රෝහල් ගත කෙරුණේ, පෙනහලූ ආසාදනයකට ලක් වීමෙනි.

රෝහල් ගත කෙරුණු අවස්ථාවේ ඔහුට කඩිනමින් ප‍්‍රතිකාර ලබා දීමට වෛද්‍යවරු කි‍්‍රයා කළහ. වෛද්‍යවරුන් එම අවස්ථාවේ කියා සිටියේ අවශ්‍ය ප‍්‍රතිකාර ලබා දීමෙන් පසු මැන්ඩෙලාගේ සෞඛ්‍ය තත්ත්වය අසාධ්‍ය වූ නමුත් ස්ථාවර තත්ත්වයකට පත් වූ බවය. කෙසේ නමුත් මීට දින දෙකකට පසු ඔහුගේ සෞඛ්‍ය තත්ත්වය තවත් නරක අතට හැරුණි. සුදු ජාතික සුළුතරය විසින් දකුණු අප‍්‍රිකාව පාලනය කළ සමයේ ඊට එරෙහිව කළු ජාතිකයන්ගේ අයිතීන් වෙනුවෙන් හඬ නැගූ මැන්ඩෙලා නිහඬ නමුත් එඩිතර දේශපාලන කි‍්‍රයාකාරියෙක් විය.

තුන් දෙනකුගේ ජානවලින් දරුවන් බිහි කිරීමට බ්‍රිතාන්‍යයේ අනුමැතිය - UK government backs three-person IVF

පුද්ගලයන් තුන් දෙනකුගේ ජාන උපයෝගී කර ගනිමින් දරුවකු බිහිකර ගැනීමේ අයිවීඑෆ් ( IVF) තාක්ෂණයට අවසර ලැබෙන ව්‍යවස්ථා කෙටුම්පතක් මේ වසර අවසාන භාගයේදී ඉදිරිපත් කරන බව බ්‍රිතාන්‍ය ආණ්ඩුව පවසයි.

මේ අනුව තුන් දෙනකුගේ ජාන යොදා දරුවන් බිහිකර ගැනීමට අවසර දෙන පළමු රට බවට බ්‍රිතාන්‍යය පත් වනු ඇත.මෙම තාක්ෂණ වැඩ පිළිවෙලේ බලාපොරොත්තුව, ඉතාම බරපතල මට්ටමේ ආබාධිත දරුවන් බිහිවීම වළක්වා ගැනීමට දෙමව්පියන්ට උපකාර වීමයි.

බ්‍රිතාන්‍යයේ ප්‍රධාන වෛද්‍ය නිලධාරිනී මහාචාර්ය සැලී ඩේවිස් නව අයිවීඑෆ් තාක්ෂණ වැඩ පිළිවෙල සම්බන්ධයෙන් ප්‍රකාශයක් කරමින්, නව ක්‍රියාමාර්ගය යටතේ දෙමව්පියන්ගෙන් ලබා ගන්නා ඩීඑන්ඒ ජානවල වෙනස් කමක් සිදු නොකෙරෙන බවයි සඳහන් කළේ .මහාචාර්ය සැලී ඩේවිස් විස්තර කරන ආකාරයට මෙහිදී සිදුවන්නේ නිරෝගී දරුවකු සඳහා හේතු නොවන දුර්වල මාතෘ සෛල වලට වෙනත් මවකගේ සෛල රැගෙන කළලය සඳහා මුහු කිරීම.මේ අනුව එක් පුරුෂයකු සහ කාන්තාවන් දෙදෙනෙක් එවැනි දරු උපතකදී සෛල මගින් දායක වෙති.

රුපියල තවත් බාල්දු වේ - Sri Lanka rupee fall unnecessary

පියවර නොගතහොත් ඉදිරියේදී තවත් වැටීමට ඉඩ

අද විනිමය වෙළඳ පොළේ රුපියල දුර්වල වීමක් සිදුවූ අතර මුදල් වෙළෙඳුන් පැවසූවේ ඩොලරයක මිල රුපියල් 130.75/90 ක් දක්වා වැඩිවූ බවයි.බ්ලූම්බර්ග් පුවත් සේවාවේ දත්ත වලට අනුව දෙසැම්බර් මාසයේදී ඩොලරයක මිල රුපියල් 130.55 ක මට්ටමක විය.

පසුගිය සති තුන තුළදී මුදල් වෙළඳ පොළේ පවතින අතිරික්ත ද්‍රවශීලතාවය හමුවේ රුපියල මෙසේ දුර්වල වෙමින් තිබේ.මහ බැංකුව විසින් වාණිජ බැංකුවල ව්‍යවස්ථාපිත සංචිත අවශ්‍යතාවය සියයට 02 කින් අඩු කිරීම ජූලි 01 වනදා සිට ක්‍රියාත්මක කිරීමත් සමග රුපියල් බිලියන 35-40 අතර අතිරික්ත ද්‍රවශීලතාවයක් බැංකු ක්‍රමයට පැමිණීමට නියමිතය.මෙසේ ද්‍රවශීලතාවය වැඩිවීම රුපියල කෙරෙහි ඉදිරියේදී තව තවත් පීඩනය වැඩි කරනු ඇතැයි විශ්ලේෂකයින් පෙන්වා දේ.ශ්‍රී ලංකා රුපියල අවප්‍රමාණය වෙද්දී ඉන්දියාව ඇතුළු කළාපීය රටවල් කිහිපයකම මුදල් ඒකක අවප්‍රමාණය වීමක්ද සිදුව තිබේ.

ඩොලරයට සාපේක්ෂව රුපියල විශාල ලෙස අවප්‍රමාණය වීම පිළිබඳව බියවිය යුතු නැතැයි ශ්‍රී ලංකා මහ බැංකුවේ අධිපති අජිත් නිවාඩ් කබ්රාල් මහතා කියයි.ඇමරිකානු ඩොලරයට සාපේක්ෂව රුපියල ඊයේ සියයට 01 කට වඩා අව ප්‍රමාණය වූ අතර බ්ලූම්බර්ග් පුවත් සේවාවේ දත්ත වලට අනුව 2012 ජුනි මාසයෙන් පසුව රුපියල අවප්‍රමාණය වූ වැඩිම ප්‍රමාණය මෙයයි.ඊයේ පස්වරුව වනවිට ඩොලරයක් ගනුදෙනු වූයේ රුපියල් 130.65 ක මට්ටමකයි.

ගුරුවරියක දණ ගැස්වු මන්ත්‍රී පොල්ගසයි - Teacher ‘kneeler’ granted bail

ගුරුවරියක දණ ගැස්වු බවට චෝදනා ලැබීමෙන් රක්‍ෂිත බන්ධනාගාරගතව සිට ඊයේ (27) ඇප මත මුදා හැරුණු වයඹ පළාත් සභාවේ හිටපු මන්ත‍්‍රීවරයෙකු වන ආනන්ද සරත් කුමාර මහතා, පසුව ආනමඩුව අයියනායක දේවාලය වෙත ගොස් පොල් ගසා කන්නලව්වක් කළේය.

සිය නිර්දෝෂිභාවය රටට පෙන්වා දෙන්නැයිඔහු දෙවියන්ගෙන් ඉල්ලා සිටියේය.ඇතැම් පිරිස් තමන් සම්බන්ධයෙන් වැරදි වැටහීමක සිටිය ද සත්‍ය දන්නා සියලූ දෙනා තමන්ට සහය දක්වන බවද කියා සිටි ආනන්ද සරත් කුමාර හිටපු මන්ත‍්‍රීවරයා, එම ස්ථානයේ සිටි මාධ්‍යවේදීන් අමතමින් මෙසේද කියා සිටියේය.

'' මේ වෙලාවේ මාධ්‍ය පිළිබඳවත් කනගාටු වෙනවා. නොකරපු සිද්ධියක් පිළිබඳව මේ ආකාරයෙන් ප්‍රචාරය ලබාදීම ගැන දුකයි. සිද්ධිය වෙන වෙලාවේ නියෝජ්‍ය විදුහල්පතිවරු දෙපළක්, ආචාර්ය මණ්ඩලයේ හතර දෙනෙක් මුරකරුවෙක් ගුරුවරියක් මේ සියලු දෙනාම කියනවා මම වාහනයෙන් බැස්සේ නෑ කියලා. මම මැතිවරණ 5කට මුහුණ දුන්නා. ආණමඩුව ආසනයේ ජනතාව මා සමඟ ඉන්නවා. මම අවුරුදු 22ක් තිස්සේ හදා ගත්ත ආත්ම ගෞරවය නැති වුණා.

ඉන්දු-ශ්‍රී ලංකා-කොදෙව් තුන්කොන් ගැටුම අද ඇරැඹේ - Tri-Nation Series in West Indies

බටහිර ඉන්දීය කොදව් දේශයේ පැවැත්වෙන සෙල්කොන් කුසලාන තුන්කොන් ක්‍රිකට්‌ තරගාවලියේ සමාරම්භය ශ්‍රී ලංකාව සහ සත්කාරක බටහිර ඉන්දීය කොදෙව් කණ්‌ඩායම අතර තරගයෙන් අද (28 දා) ජැමෙයිකාවේ සබීනා පාක්‌හිදී ආරම්භ වේ. දිවා තරගයක්‌ ලෙස පැවැත්වෙන මෙම තරගය ශ්‍රී ලංකාවේ වේලාවෙන් රාත්‍රී 8 ට ආරම්භ වේ.

ලෝක ශූර ඉන්දීය කණ්‌ඩායම, අනුශූර ශ්‍රී ලංකාව සහ විස්‌සයි - 20 ශූර බටහිර ඉන්දීය කොදෙව් යන කණ්‌ඩායම් මෙම තරගාවලියේදී තරග වැදීම තරගාවලිය ඉතාමත් තියුණු තරගාවලියක්‌ වනු ඇත.

චැම්පියන් කුසලාන තරගාවලියේදී ශ්‍රී ලංකාව අවසන් පූර්ව තරග වටය දක්‌වා පැමිණි අතර එහිදී ශූරතාව දිනූ ඉන්දීය කණ්‌ඩායම හමුවේ පරාජයට පත්විය. කොදෙව් කණ්‌ඩායම පළමු වටයෙන්ම තරගාවලියෙන් ඉවතට විසිවුණු කණ්‌ඩායම් 4 ට එක්‌ වුවත් එම තරගවලදී ඔවුන් දැක්‌වූ තරග විලාශය අනුව කිසි විටෙකවත් ඔවුන්ව අවතක්‌සේරු කළ නොහැක. අදාළ තරගාවලියේදී දකුණු අප්‍රිකාව සමග පැවැති තරගයට වර්ෂාව හරස්‌ නොවූයේ නම් එම තරගය ජය ගනිමින් නිසැකයෙන්ම දෙවැනි වටයට අවතීර්ණ වීමේ අවස්‌ථාව කොදෙව් කණ්‌ඩායම සතුව තිබිණ.